Rägen, Rägen, drus’!
Wi sitt hier warm in’n Hus’.
De Vageln sitt in’n Bom to kuurn.
De Köh de staht an Wall to schuurn.
Rägen, Rägen, drus’!
Wi sitt hier warm in’n Hus’.

Rägen, Rägen, rusch!
Wa’ rüükt dat ut den Busch!
De Blöm’n, de hangt so slaapri’ daal!
De Bööm de röhrt de Blæd’ ni’ maal.
Rägen, Rägen, rusch!
Wa’ rüükt dat ut den Busch!

Rägen, Rägen, sus’
Vun baben op uns Huus,
Vun’t Dack hendaal in strieken Stroom
Un liesen ut den Eschenboom!
Rägen, Rägen, sus’
Vun baben op uns Huus!

Rägen, Rägen, rull
Bet alle Gröben vull!
Denn laat de Wulken œvergahn!
Laat de Sünn wedderkam’n!
Rägen, Rägen rull
Bet alle Gröben vull!