e vervoersmogelijkeden vanof ons eiland waere vô die tied erg modern. ’t Was
zelfs op’enome in de vliegroute Rotterdam – Knokke. De vliegvelden Aemstie
in Souburg waere tussenstations.
Dit vervoer kwam, vanwege de kosten, vôr ons nie in anmerkieng. Op een keer
was t’er een êel fêest op ’t vliegveld Aemstie bi de viertoren mi verschillende
vliegdemonstraoties. M’n moeder kon ’t toen binae nie laete om een rondvlucht
te maeken mit der kinders, mâ ze durfde et toch nie an tegenover m’n vaoder.
Toch is dat verlangen om eêns te vliegen noôit bie der verdwene. Toen z’ a
boven de tachtig was is ’t er toch nog van ekomme. Mit een zweefvliegtuug kreeg
ze mit vee genoegen der luchtdaop op’t vliegveld Midden-Zeêland.
In de luchtvaert wier in de dertiger jaeren nog veel op zicht evloge. Zô waere
der langs de belangriekste routes luchtvaertlichten ebouwd, een soôrt kleine
viertorens midden in ’t land.
Dreister en Willelminadurp bezaete alletwêe zô’n kunstwerk vô de route Rotterdam – Londen.
Ok de militaire luchtvaert was op Schouwen nie onbekend. Vanof vliegveld Aemstie
wier der boven de Grevelienge vôr ons durp druk ’oefend. Der lag daer een vlot
as doel, waerop mit Fokker tweêdekkers wier edoke. As we gienge zwemme bie
Kiekuut was dat best aordig. Toe ’k in d’êeste of twêede klasse zat sloeg der
nog zô’n Fokker in de polder Bloôis te pletter. Daebie kwam een zeune van de
toen zeer bekende dichter Clinge Doôrenbos om ’t leven, ie scheen an’t stunten
ewist te wezen vor een vriendinnetje van em in Brouwsaeven.
Hét vervoermiddel in die voôroôrlogse jaeren was de fiets. Er waeren der
zô veel van in der waere toen nog zô weinig auto’s dat ze’t slachtoffer van
de Belasting waere. Iedere fiets most een fietsplaetje è, een kopere straokje
mit in’esloge letters in ciefers. De in die tied veel voôrkômende werkelôzen
krege der eên gratis. Mâ dan zat der wel een gaetje in want iedereên most kunne
zie da je d’er nie vô betaeld ao!
Auto’s waere der nog nie vee. In ons durp mit zô’n achtonderd inwoners
waere ze letterlijk op de viengers van eênen and te tellen. Je kon daerom nog
zonder gevaer op straete spele.
Frontpage
e vervoersmogelijkeden vanof ons eiland waere vô die tied erg modern. ’t Was
zelfs op’enome in de vliegroute Rotterdam – Knokke. De vliegvelden Aemstie
in Souburg waere tussenstations.
