Reinhard F. Hahn

[To Reinhard F. Hahn’s index]

Stappen in’n Sand

’n Ghazal för Bärbel

De Padd is swaar un düüster na dat inst vertrude Land.
De Jahren, och, de sünd ja niks as Stappen in’n Sand.

An güll’ne Harvstdaag’ ween man nich de Summerwischen na!
Kinnertiedsborgen sünd al lang all wegpuustt mit’n Sand.

De See ’s ’n Fründ. Sogaar de Möwen swiegt an’n laten Strand.
Ik kiek mi üm un tell jüm all, de Stappen in’n Sand.

Mien Süster hett ehr Gaarn plantt güntsied dat brake Land.
De Jahren, och, de sünd ja niks as Stappen in’n Sand.

Se steiht un smüüstert moi un blied’. De Harvstsünn warmt ehr Haar.
Ehr Bloom’n un Bööm, de scheett in’t Kruud ut güüsten Geestensand.

Mien Süster maakt er Gaarnpoort up, suutje, mit sachte Hand.
De Jahren, och, de sünd ja niks as Stappen in’n Sand.

De Nachtegall hett tirileert den helen Summer lang.
De Wäpeldoorn, de ahnt sachs al den Frost up Masch un Sand.

Draad’ Schummertied, denn Nacht, denn Ucht, denn juucht de Hahn in’t Land.
De Jahren, och, de sünd ja niks as Stappen in’n Sand.

[To Reinhard F. Hahn’s index]