Lowlands-L is een g’automatiseerde e-mail-lieste vo mensen waereldwied die a belangstellienge è vo de taelen en culturen van de laege landen an Noord- en Oôstzeê (’iernae „Laege Landen“). Lowlands-L oor gestierd deu Listserv bie LINGUIST. De b’eerder is Reinhard F. Hahn.
Lowlands-L ’ouw z’n eige voraol doende mee de Germaanse taelen en culturen die a daemee een band è, zò as die d’r eige in de Laege Landen ontwikkeld è (’Ollands, Limburgs, Fries, Nedersassisch [Nederduuts, Platduuts], Zeêuws [West-Vlaoms]*). Oôk is t’r andacht vo taelen en culturen die a daè een ’istorischen band mee è, mae op aore plekken in de wèreld gebruukt ore (Afrikaons, Iengels, Scots, taelen van landveruzers en zò en pidgins en creooltaelen die a teruggae op deze taelen). Oôk aore taelen en culturen kunne in dit verband ang’aele ore.
’t Bin dan wè nie wat a ons Laeglandse taelen noeme, mae Duuts, Luxemburgs, Jiddisch, Scandinaovische taelen en Gotisch kunne en meuge oôk besproke ore. Da geldt voraol a-t ’t gaet om woordafkomst en geschiedenis. Bie uutnemendheid bin de Duutse dialecten van Noord-Duutsland van belang. Da bin varianten daer a-t ’t Nedersaksisch (Nederduuts) vee invloed op g’aod è. ’t Zelde geldt vo Scandinaovische taelen daer as een berg invloed uut ’t Nedersaksischen in terug te vinden is.
* Onder "Zeêuws" verstae me daebie aolle dialecten die a gesproke ore in de Nederlandse pervincie Zeêland (b’aolve de Oôst-Vlaomse dialecten van ’t Land van ’Ulst en somste grensdurpen in Zeêuws-Vlaenderen), en op de Zuud-’Ollandse eilanden Goereê-Overflakkee en (vo een stikje) Voorne-Putten. Zeêuws oor butendien gesproke in Zeêuwse ’kolonies’ in Brazilië en in plekken as ’t stadje Zeeland in Michigan. Zeêuwse creooltaelen bin d’r oôk: Neger’ollands (US Virgin Islands, uutgesturve), Skepi Dutch en Berbice Dutch (aollebei in Guyana en aollebei naebie uutgesturve). ’t West-Vlaoms is stikke nauw verwant an ’t Zeêuws en ei daerom oôk onzen andacht. ’t West-Vlaoms oor grofweg gesproke in de Belse pervincie West-Vlaenderen en in ’t westelijk deêl van ’t département Nord (59) in Frankriek.
De belangriekste doelstelliengen van Lowlands-L
’t makkelijker maeken van communicaotie en saemenwerkienge tussen lui die a d’r eige interessere vo de taelen en culturen van de Laege Landen waereldwied;
’t bevorderen en vereênvoudigen van onderzoek nae en onderwies in de taelen en culturen van de Laege Landen;
’t bevorderen van ’t gebruuk van taelkundige en culturêle gegevens mee betrekkienge toet de Laege Landen in meêr algemeên onderzoek;
’t ondersteunen van pogiengen om de kleinere en bedreigde taelen en variëteiten binnen de Laege Landen te beschermen, nieuw leven in te blaezen en te promoten;
’t schienken van andacht an de kleinere taelen en culturen binnen de Laege Landen, oôk a die taelen en culturen nie officieel erkend ore;
’t dienen as forum vo ’t zoeken nae overeênkomsten en verschillen tussen de taelen en culturen van de Laege Landen;
’t scheppen van een meugelijkeid vo communicatie in verschillende, mae onderlieng begriepelijke taelen;
’t versterken van de taelkundige, culturêle en sociaole band tussen dem mensen die a de taelen van de Laege Landen praote, ulder naekommeliengen en ulder maots.
Om je an te ’ouwen
Aolle biedraegen an Lowlands-L moete beleefd en vriendelijk van toône weze;
Lowlands-L moe je nie gebruke vo persoônlijke booschappen. Daer ei je j’n eige privé middels vo;
A je wat te melden eit over publicaoties, software, conferenties, programma’s of vacatures of zò, dan ka je dat vie Lowlands-L doee, mae commerciêle biedraegen ore geweerd;
A je een algemêne vraege stelt op Lowlands-L, oor je gevroge de gegevens die a je daedeu verzaemeld eit, saemen te vatten vo aore abonnees wae a je bie an moe gee wien at er op je vraege gereageerd eit;
Je mag zelf wete in wavo taele a je je biedraegen an Lowlands-L opstelt, mae ’t zou wè makkelijkste zien a je d’r eên uut de volgende keur gebruukt: Afrikaons, ’Ollands, Zeêuws, Limburgs, Fries (aolle variëteiten), Nedersassisch, Iengels en Scots;
Home
This
page is in Zeelandic (Zealandic).
