This page is in Western Flemish.

Welkom bie Lowlands-L!

Lowlands-L is ’n g’automatiseerde e-maillijste vo mins’n van ol over de weireld die intresse ein vo de taol’n en cutur’n van de leêge land’n van an de Noôrdzeê tot an d’Oôstzeê (hierondre leêge land’n). Lowlands-L wordt bestierd deur Listserv bie LINGUIST. Den boas van’t spel is Reinhard (Ron) Hahn.

Een abonnement op Lowlands-L is voô nieten, ge moet er nie voôrn betaol’n.

Lowlands-L houdt ’em voôral bezig me Germaonsche taol’n en de cultur’n die dao mee vandoen ein, lik of dat die ulder ontwikkeld ein in de leêge land’n (Nederlan’s, Ollan’s, Zeêuws, Limburgs, Fries, Nederduuts/Platduuts en Platvlams of Westvlams). D’r is oôk andacht vo taol’n en cultur’n die nen ’istorisch’n band ein met ol de zaok’n da’k juste ein vernoemd, mo die elders in de weireld gebruukt word’n (Afrikaons, Ingels, Scots, taol’n van landveruzers, pidgins en creooltaol’n die van de taol’n hierbov’n afkomstig zijn). Oôk andere taol’n kunn’ in da verband an d’orde komm’.

Der wordt misschien niet zovele geschrev’n over Duuts, Luxemburgs, Jiddisch, Scandinavisch,Gotisch en andere taol’n in de leêglandse discussies, mao ze kunn’ toch van belang zijn ao we bezig zijn met etymologie of gechiedenisse. Oez’ interesse gaot ier speciaol nao de Duutse dialect’n van Noôrd-Duutsland, of van Neder-Duutse invloed’n up ’t Duuts (lijk ’t Missings), of van Neder-Duutse invloed up ’t Scandinavisch en andere taol’n.

Wao will’ me naortoe met Lowlands-L?

• ’t Gemakkelikker maok’n van communicaotie en saomenwerkinge tuss’n iedereên die zich interesseerd vo de taol’n en cultur’n van de leêge land’n van over heêl de weireld

• ’t Doen toenem’n en vereênvoudigen van onderzoek nao en onderwijs in de taol’n en cultur’n van de leêge land’n

• ’t Doen toenem’n van ’t gebruuk van taolkundige en cultureêle gegevens me betrekkinge tot de leêge land’n in meêr algemeên onderzoek

• Ondersteuninge van poging’n om de kleêndere en bedreigde taol’n en variëteit’n binn’ de leêge land’n te bescherm’n, nieuw lev’n in te blaoz’n en een bitje reclame voôrn te maok’n

• Andacht schink’n an kleêndere taol’n en cultur’n binn’n de leêge land’n, oôk aot die taol’n en cultur’n nie van rechtswege erkend zijn

• ’t Dien’n als een forum vo’t zoek’n nao d’overeênkomst’n en verschill’n tuss’n de taol’n en cultur’n van de leêge land’n

• ’t Schepp’n van ne meugelijk’eid vo communicatie in verschill’nde mao onderling begrijpelikke taol’n

• ’t Versterk’n van de taolkundige, cultureêle en sociaole band tuss’n ol de mins’n die een leêgelandstaole klapp’n, ulder naozaot’n en ulder maot’n 

Voô schoône manier’n t’ein

• Olles wat da je nao Lowlands-L zendt moe beleefd en vriendelijk van toôn zijn.

• Lowlands-L moe je nie bezigen vo persoônlikke bericht’n. Daor ei je j’n eigen privémiddels voô.

• Je meugt olles vertell’n over publicaoties, software, conferenties, programma’s, vacatures of ’k weet nie wa, mao ’t mag nie me commerce te maok’n ein, want da komt er niet in.

• p>Ao je n’algemeêne vraoge up Lowlands-L gesteld eit, zou me ton meug’n vraog’n da je dadde een bitje te gaore en in’t kort deureverteld an d’andere abonnees, waormee da je vermeldt wie dat er up joen vraoge(n) gereageerd eit.

• Je meugt zelve kiez’n in wukk’n taole da je wilt meedoen., mao ’t zou wel gemakkelik zijn ao je d’r eên uut’aolt die de voôrkeure wegdraogt van Lowlands-L: Afrikaons, Nederlan’s, Zeêuws, Vlams (alle soôrt’n), limburgs, Fries (alle soôrt’n), Nedersaksisch, Ingels en Scots.

• Regels en anwijzing’n (in’t Nederlan’s)

• Disclaimer (in English)

Abonnement? Klik ’iere!

Translation: Luc Vanbrabant