Wèlkommen bie Lowlands-L!

Lowlands-L is n automatiseerde e-postliest veur n internasjonoal publiek van interesseerden ien de toalen en kulturen van de lege landen aan de kost bie de Noord- en Oostzee laanges (van nou òf aan „Lege Landen“). Lowlands-L wordt stuurd deur Listserv bie LINGUIST. Beheerder is Reinhard F. Hahn.

Abonnemìnt op Lowlands-L is veur geefs.

Lowlands-L richt zok veuraal op de Germoanse toalen en de doarmit verbonden kulturen, zo as dij zok ontwikkeld hebben ien de Lege Landen (Nederlaands, Zais, Frais, Leegsaksisch [Nederduuts, Platduuts], Limbörgs), en op de toalen en kulturen dij hiermit n historische verbondschop hebben en aanswoar broekt worden (Afrikoans, Engels, Skots, toalen van boetenlopers, pidgins en mengtoalen woar dizze toalen heur weerklank ien hebben). Ook aander toalen en kulturen kinnen ien dit koader truggekommen.

De belaangriekste doulstèllen van Lowlands-L

• t Makkelker mòken van wereldwiede kommunikoatsie en manen tuzzen dij dij zok interesseern dudden veur de toalen en kulturen van de Lege Landen;

• t aanpitjen en makkelker mòken van onderzuik noar en onderwies ien de toalen en kulturen van de Lege Landen;

• t aanpitjen van t broeken van toalkundege en kulturele waitens mit betrekken tou de Lege Landen ien meer algemain onderzuik;

• t hèlpen van pogings om de lutjedere en bedraigde toalen en varianten binnen de Lege Landen tou beschaarmen, nij leven ien te poesten en tou man tou brengen;

• t schenken van aandocht aan de lutjedere toalen en kulturen binnen de Lege Landen, woarbie ook de toalen en kulturen dij nait offisjeel erkend binnen heuren;

• t dainen as forum veur t zuiken noar overainkomsten en onderschaaid tuzzen de toalen en kulturen van de Lege Landen;

• t opzetten van n meugelkhaid veur kommunikoatsie ien verschaaidene, mòr wel veur elkander begriepboare toalen;

• t aanstaarken van de toalkundege, kulturele en sosjoale baand tuzzen proaters van de toalen van de Lege Landen, heur noakommers en heur kamroaden.

Regels

• Aal biedroagen aan Lowlands-L zellen beleefd en vrundelk van toon wezen mouten;

• Lowlands-L is nait bedould veur persoonliekse kommunikoatsie. Dat dudden joe mòr via prive-knoalen;

• Veurzèggens van publikoatsies, software, konferìnsies, programmen of vakatures binnen maggen, mòr kommersjele biedroagen worden nait goudkeurd;

• As joe deur n aalgemaine vroagstèllen op Lowlands-L gegevens opvroagen, worden joe vrundelk vroagt hier n soamenvatten van tou mòken veur de aander abbonees, mit doarbie n vermèlden van wel der op joen vroag reageerd het;

• Joe maggen zulf waiten ien wat veur toal joe aan Lowlands-L biedroagen, mòr t laifst wel ien ain van de volgende toalen: Afrikoans, Nederlaands (aal Leegfrankische varianten), Frais (aal varianten), Leegsaksisch (aal varianten), Engels en Skots;

Klik hierzoot veur de Regels en richtlienen (schreven op Hollaands).

Lid worden? Klik hier!

Wi-j meedoon? Klik hier!

(This page is in Groningen Low Saxon/Low German (the Netherlands). Translator: Niek Berendsen, Groningen, Netherlands)